Id metuens veterisque memor Saturnia belli,
Prima quod ad Trōiam prō cāris gesserat Argis —
Necdum etiam causae irārum saevique dolōrēs
Exciderant animō: manet alta mente repostum
Iudicium Paridis sprētaeque iniuria fōrmae,
Et genus invisum, et rapti Ganymēdis honōrēs
His accensa super iactātōs aequore tōtō
30 Trōas, reliquias Danaum atque immitis Achilli,
Arcebat longe Latiō, multosque per annōs
Errābant, acti fātīs, maria omnia circum.
Tantae mōlis erat Rōmānam condere gentem.
Vix ē cōnspectū Siculae tellūris in altum
Vēla dabant laeti, et spūmās salis aere ruebant,
Cum Iūnō, aeternum servāns sub pectore vulnus,
Haec secum: "Mēne incepto desistere victam,
Nec posse Italia Teucrōrum avertere rēgem?
Quippe vetor fātis. Pallasne exūrere classem
Argivum atque ipsōs potuit summergere ponto,
Unius ob noxam et furiās Āiācis Oīlī?
Ipsa, Iovis rapidum iaculāta ē nūbibus ignem,
Disiēcitque ratēs ēvertitque aequora ventis;
Illum exspirantem transfixō pectore flammās
Turbine corripuit scopulōque īnfīxit acūtō;
Ast ego, quae dīvum incēdō rēgīna, Iovisque
Et soror et coniunx, ūnā cum gente tot annōs
Bella gerō. Et quisquam numen Iūnōnis adōrat
Praeterea, aut supplex āris imponet honorem?"
Talia flammātō sēcum dea corde volūtāns
Nimbōrum in patriam, loca fēta furentibus austrīs,
Aeoliam venit. Hic vāstō rēx Aeolus antrō
Luctantēs ventōs tempestātēsque sonōrās
Imperio premit ac vinclis et carcere frenat.