Dum novus in viridi coalescit cortice ramus, Concutiat tenerum quælibet aura, cadet. Mox eadem ventis spatio durata resistet, Firmaque adoptivas arbor habebit opes. Or. Casus.
Casus ubique valet; semper tibi pendeat hamus: Quo minime credas gurgite, piscis erit.
Sæpe canes frustra nemorosis montibus errant;
Inque plagam nullo cervus agente cadit. Ov.
In amicum perfidum.
Dum mea puppis erat validâ fundata carinâ,
Qui mecum velles currere, primus eras:
Nunc, quia contraxit vultum Fortuna, recedis;
Auxilio postquam scis opus esse tuo.
Hei mihi! difficile est imitari gaudia falsa;
Difficile est tristi fingere mente jocum.
Nec bene mendaci risus componitur ore,
Nec bene sollicitis ebria verba sonant.
Non sic incerto mutantur flamine Syrtes,
Nec folia hyberno jam tremefacta noto;
Quam cito fœmineâ non constat fœdus in irâ;
Sive ea causa gravis, sive ea causa levis. Prop.
Cantus vicinis fruges traducit ab agris ;
Cantus & iratæ detinet anguis iter;
Cantus & e curru lunam deducere tentat:
Et faceret, si non æra repulsa sonent.
Lucrum.
Lucra petens habili tauros adjungit aratro,
Et durum terræ rusticus urget opus.
Lucra petituras freta per parentia ventis
Ducunt instabiles sidera certa rates.
Non bibit inter aquas, poma aut pendentia carpit Tantalus infelix, quem sua vota premunt. Divitis hæc magni facies erit; omnia cernens Qui timet, & sicco concoquit ore famem. Petron.
Non est forma satis; nec, quæ vult bella videri,
Debet vulgari more placere sibi :
Dicta, sales, lusus, sermonis gratia, risus
Vincunt naturæ candidioris opus.
Incertus est vitæ cursus.
Non unum vitæ servat Fortuna tenorem;
Nec certo fruitur panda carina salo;
Nam modo Threicio Boreà, modo currimus Euro,
Sæpe tument Zephyro lintea, sæpe Noto. Ov.
Diversi ut variant morbi, variamus & artes;
Mille mali species, mille salutis erunt:
Corpora vix ferro quædam sanantur acuto;
Auxilium multis succus & herba tulit.
Non ego mordaci destrinxi carmine quenquam ; Nec meus ullius crimina versus habet. Candidus a salibus suffusis felle refugi;
Nulla venenato littera mista joco est; Inter tot populi, tot scripti millia nostri, Quem mea Calliope læserit, unus ego.
Amicorum inconstantia.
Diligitur nemo, nisi cui fortuna secunda est ;
Quæ simul intonuit, proxima quæque fugat.
En ego! non paucis quondam munitus amicis,
Dum flavit velis aura secunda meis ;
Ut fera nimboso tumuerunt æquora vento,
In mediis lacerâ puppe relinquor aquis. Ov
Mala sua innumerabilia esse Naso asserit. Cinyphiæ segetis citius numerabis aristas, Altaque quam multis floreat Hybla thymis; Et quot aves motis nitantur in aëra pennis;
Quotque natent pisces æquore, certus eris: Quam tibi nostrorum statuatur summa laborum, Quos ego sum terrâ, quos ego passus aquà. Ov.
Ecce! jacent collo sparsi sine lege capilli;
Nec premit articulos lucida gemma meos:
Veste tegor vili; nullum est in crinibus aurum;
Non Arabo noster rore capillus clet.
Cui colar, infelix! aut cui placuisse laborem !
Ille mei cultûs unicus auctor abest.
Rustica sim sane, dum non oblita pudoris;
Dumque tenor vitæ sit sine labe meæ.
Si non est ficto vultus mihi tristis in ore,
Nec sedeo duris torva superciliis ;
Fama tamen clara est; & adhuc sine crimine vixi: Et laudem de me nullus adulter habet.
Nulla dies adeo est Australibus humida nimbis,
Non intermissis ut fluat imber aquis:
Nec sterilis locus ullus ita est, ut non sit in illo
Mista fere duris utilis herba rubis.
Nil adeo fortuna gravis miserabile fecit,
Ut minuant nuilà gaudia parte malum.
Briseis Achilli.
Sis licet immitis, matrisque ferocior undis ;
Ut taceam, lacrymis comminuere meis.
Respice solicitam Briseida, fortis Achille,
Nec miseram lentâ ferreus ure morâ :
Aut, si versus amor tuus est in tædia nostri,
Quam sine te cogis vivere, coge mori.
Parva petunt Manes; pietas pro divite grata est
Munere: non avidos Styx habet ima Deos.
Tegula projectis satis est velata coronis ;
Et sparsæ fruges, parcaque mica salis ;
Inque mero mollita Ceres, violæque solutæ :
Hæc habeat mediâ testa relicta viâ.
Ludorum amantes fœminæ.
Ut redit, itque frequens longum formica per agmen,
Granifero solitum cum vehit ore cibum,
Aut ut apes, saltusque suos & olentia nacta
Pascua, per flores & thyma summa volant:
Sic ruit ad celebres cultissima fœmina ludos;
Copia judicium sæpe morata meum.
Estur ut occultâ vitiata teredine navis ;
Æquorei scopulos ut cavat unda salis;
Roditur ut scabrâ positum rubigine ferrum ;
Conditus ut tineæ carpitur ore liber:
Sic mea perpetuos curarum pectora morsus,
Fine quibus nullo conficiantur, habent. Ov.
Perfer & obdura.
Tempore difficiles veniunt ad aratra juvenci ;
Tempore lenta peti fræna docentur equi;
Ferreus assiduo consumitur annulus usu ;
Interit assiduâ vomer aduncus humo:
Quid magis est saxo durum? quid mollius undâ?
Dura tamen molli saxa cavantur aqua.
|