CUM primum ad Corpus hoc Poetarum publici juris faciendum operam meam librariis pollicerer, id tantum a me exigebatur, ut typographi culpas corrigerem, breviculasque singulis auctoribus notitias, quas dicunt, præmitterem. Quod monitum volui lectorem, ne, quod alieni consilii esset, id mihi, velut totius rei auctori atque ordinatori, tribueretur. Quod si, animi studio ultra præscriptos fines provectus, aliquid de meo adjecerim, id vero, quale quantumque sit, cum fusius exponere olim statuissem, tacere decrevi. In hujusmodi scilicet rebus non, quomodo quid effectum sit, quæritur, sed quale sit id, quod effectum est. Illud autem agebatur, ut opus ejusmodi prodiret, quod neque eruditioribus prorsus displiceret, et Romanæ poeseos studiosis gratum acceptumque esset. Quod si consecuti sumus, ut aliqua certe ex parte consecutos nos esse speramus, minime sane opus erit, ut aut meritorum præconio aut vitiorum excusatione lectorem moremur. Dabam e Collegio SS. Trinitatis apud Cantabrigienses, XVI. Kal. Dec. MDCCCXXVII. GULIELMUS SIDNEY WALKER. |