Par monseigneur le Duc, etc., les baron Daguerre ser de Vyenne, grant maistre d'hostel et gens des comptes de Lorraine presens, et pour secretaire, Didier Menget. Rta J. Beurges. 14 Mars 1542. Charte du duc Antoine, en faveur des habitants des villages du ban et de la mairie de Vagney. Orig, Trésor des chartes de Lorr. Lettres patentes, registre B, 22, fo 150, vo. Anthoine, etc., à tous ceulx qui ces presentes lettres verront, salut. Savoir faisons que considerans, après dheu rapport à nous fait par noz officiers qui de ce ont heuz charge de nous, les villaiges de la mairie et ban de Waigney en nostre prevosté d'Arches, estre scituez et assiz en lieu fort sterille et infructueux auquel les manans et habitans audit ban et mairie ce puissent ayséement alymenter et norir, ilz, leurs femmes et enffans, seroient à ceste cause contrains de chercher autre moyen de vivre et de gaigner quelque deniers pour nous payer les rentes et redevances que les demeurans audit ban et mairie, present et advenir, nous sont attenuz, ce qu'ilz font à si grande peine et travailz qu'ilz n'ont rien ou peu de reste pour leur dit vivre et de leurs dictes femmes et enffants, qui dès longtemps a peu causer inclination aux habitans habandonner les lieux et vuyder desoubz nous, à nostre dompmaige, et poulroit encore estre fait à l'advenir, comme ilz nous ont fait remonstrer, sy remède n'y est donné de par nous convenables et tel que bonnement lesdits habitans ce puissent norir soubz nous. A quoy voulans pourveoir, pour le bien de nous et de nosdits subjectz audit ban et mairie de Waigney, presens et advenir, avons iceulx de nostre propre mouvement et grace especialle abonnez et reduictz quant au fait de l'ayde ordinaire seullement qu'ilz nous sont chacun an attenuz, et par cestes abournons et reduysons par telle maniere qu'ilz et leurs successeurs manans et habitans, cest assavoir, chascun mesnaige nous payeront chacuns seize gros monnoie de noz pays, le fort aydant le feible, et chacune vefve huict gros, pour leur coste et gectz dudit ayde ordinaire, qu'ilz delivreront et payeront chacun an es mains de nostre recepveur dudit Arches, present et advenir, pour en remonstrer compte au contenu du nombre de tous lesdits mesnaiges et vefves, manans et demeurans en ladite mairie et ban de Waigney soubz nous, que par les commissaires de chacune ayde de par nous ordonné y seront trouvé. Mandant par ces presentes aux commissaires desdits aydes pour l'advenir ne les cotiser, tauxer ny composer plus avant, sans toutes voyes deroguer en aulcune maniere aux redebvances que iceulx habitants d'icelle mairie et ban nous sont attenuz, ny aux aydes generales, toutes et quanteffois quelles nous serons octroyées par les estatz de noz pays, au moyen que lesdits habitans seront tenuz rendre et raporter en nostre chambre des comptes de ce lieu, dedans Pasques prochaines, lettres de promesses et obligations passées par devant notaires en telle forme qu'il appartiendra par noms et surnoms, pour eulx et leurs successeurs, et satisfaire par chacun an, pour cause, dudit ayde ordinaire, à la paye de chacun mesnaige seize gros, et la vefve à l'équipolent, manans et demeurans en ladite mairie et ban de Waigney et que y viendront demeurer et resider soubz nous comme dit est. Car ainsy nous plaist. En tesmoingt de ce, etc. Donné en nostre ville de Nancy le xiiij jour de mars l'an mil ve quarante deux, ainsy signé : ANTHOINE, gratis. Et au reploy, par monseigneur le duc, etc., lez srs de Bassompierre, bailly de Vosge, president et gens des comptes de Lorraine presens, et pour secretaire, Didier Menget. 4 Octobre 1543. Don de la maîtrise d'inciseur et tailleur de la pierre, à Jacques Perrot de Derbamont, recette de Dompaire. Origine. Trésor des chartes de Lorraine. Lettres patentes, registre B, 22, fo 183. Anthoine, etc. Comme ainsy soit que par noz pays soient plusieurs vaccabons allans et venans, contrefaisans du cirurgien, inciseurs, tireurs de pierres de dedans le corps des personnes, sans estre experimentez ny scavans en icelluy art, à raison de quoy sont plusieurs de noz subjectz perilz et assoupis, et aucunes foys languissans pouvrement le reste de leur vie, dont pour obvyer que telz gens n'ayent lieu ni ne facent telz mauvais faitz et arts en iceulx noz pays et en ce y mettre provision, savoir faisons que nous, informez du scavoir, experiment et bonne diligence estant en la personne de me Jacques Perrot en l'art de cirurgie, inciseur et tailleur, et à la priere et requeste de nostre tres cher et feal bailly de Vosges, avons donné et conferé à icelluy me Jacques Perrot residant à Darbemont, la maitrise, auctorité et puissance sur iceulx vaccabons, allans et venans par nosdits pays de Lorraine et Barroys, lesquelz ne debvront ny ne poulront praticquer dudit art de cirurgie, tailleur, inciseur de gens rompus, ayans la pierre, et aultres praticques semblables, s'ilz ne sont examinez et sermentez par ledit me Jacques Perrot, auquel avons de ce donné puissance, et ce jusques à nostre bon plaisir, moyennant aussy qu'il sera tenu nous rendre et payer par chacun an, en nostre recepte de Dompaire, douze libvres cire, et de ce en bailler caution suffisante à nostre recepveur dudit Dompaire. Et où il y auroit aulcuns desdits vaccabons sus nommez, allans ou faisans contre ces presentes, après eulx estre advertis de ces presentes, voulons et entendons iceulx en estre pugnis d'amende pecunielle, la moitié à nous aplicquer, et l'autre moitié audit me Jacques. Si donnons en mandement, par ces mesmes presentes, à tous noz justiciers, officiers, hommes et subjectz, icelluy m Jacques laisser joyr et user de cesdites presentes donnation, provision et octroy, et jusques à nostre bon plaisir, et lui donner faveur et ayde se mestier est et requis en sont. Car ainsy nous plaist. En tesmoingt de ce, etc. Donné à Myrecourt le iiije jour d'octobre l'an mil cinq cens quarante trois, Ainsi signé ANTHOINE. Et au reploy. Par monseigneur le Duc; etc., le baron de Vyenne grant maistre et chambellain presens. Et pour secrettaire J. de La Baulme. Rta J. Beurges. 94 Novembre 1545. Laix et octroi d'une tour à Darney, pour Nicolas Serrier marchand dudit Darney. Orig. Trésor des ch. de Lorr. Lettres patentes, registre B, 22, f. 235, vo. Anthoine, etc. A tous qui ces presentes verront, salut. L'humble supplication de nostre chier et bien amé Nicolas Serrier, marchant demeurant en nostre ville de Darney avons receu contenant que, on derrier de sa maison où il demeure presentement audit Darney, y a une vieille tour tendant à ruyne appellée la tour Nourel, non pourtant aucun prouffict sinon l'allet que l'on a accoustumé faire le guet par dessus les murailles, en laquelle tour, soub le bon espoir que luy avoient donnez dès longtemps aucuns de noz commis et deputez de par nous pour aultres noz affaires, lors y estans, veans estre l'augmentation de la forteresse, il y auroit mis et exposé une bonne somme de deniers montans à plus de cent florins, tant pour la refection, toicture, que fenestraiges et ferraiges en icelle tour, en nous suppliant luy vouloir ainsy permectre pour s'en servir et ayder luy, ses hoirs et ayans causes, saulf l'allet et le chemin que l'on a accoustumé à y faire le guet. Scavoir faisons que après nous avoir faict informer tant par les dessusdits commis que depuis par noz cappitaine et officiers dudit Darney à present, et par iceulx trouvé semblablement comme dessus ladite tour estre la fortification et embellissement de nostre dite ville, avons pour nous, noz hoirs et successeurs, à icelluy Nicolas Serrier, ses hoirs et ayans cause possedans ladite maison, laissé et octroyé, et par ces presentes laissons et octroyons icelle tour ainsi comme elle se comporte et contient, pour eulx en ayder et servir comme du leur propre, saulf est reservé ladite allée et le chemin pour faire le guet, et que, toutes et quantesfois que mestier sera, soit en faict de guerre ou aultrement, nous en pouvoir servir et ayder à la deffence de ladicte ville, tant par abolissement desdites fenestres pour faire canonniers que aultrement, en nous paiant à nostre recepte dudit Darney, pour recongnoissance, la somme de douze deniers par chacun an, par lesdits Nicolas Serrier, ses hoirs et ayans causes tenans et possedans ladite tour. Si donnons en mandement par ces mesmes presentes aux president, gens de noz comptes, cappitaines et officiers dudit Darney presens et advenir et à chacun d'eulx, si comme à luy appertiendra, que de cestuy nostre present laix et octroy ilz facent, souffrent et laissent lesdits Nicolas Serrier, sesdits hoirs et ayans cause à tousjours, joyr plainement et pasiblement soubz les conditions et manieres sus declairées, sans en ce leur faire ny souffrir estre faict, mis ou donné aucun destourbier ny empeschement au contraire, en rapportant par ledit recepveur sur ses prochains comptes vidimus autenticque de cesdites presentes, car ainsi nous plaist. En tesmoing de ce nous avons signé cesdites presentes de nostre main et à icelle fait appendre nostre seel. Donné en nostre ville de Nancy le vingt quatriesme jour de novembre, l'an mil cinq cens quarante trois. Ainsy signé : ANTHOINE, et au reploy Par monsgr le Duc, etc. Les president et gens des comptes de Lorraine presens, et pour secretaire Didier Menget. Rta, Jehan Beurges. 31 Mars 1543. Don de la terre et seigneurie de Lubine, à Dominique Champenois, procureur général du duché de Lorraine, en raison de ses services comme envoyé du duc de Lorraine auprès des Etats de l'Empire. Orig. Trésor des chartes de Lorraine. Anthoine, etc. Savoir faisons que, en consideration, et pour remuneration des grans, bons et loyaulx services que dès loingtemps nostre tres cher et feal conseillier, maistre aux |